Los grupos municipales del Conceyu de Xixón, sacante’l PP, van aprobar nel Plenu d’ochobre una declaración institucional propuesta por Xixón Sí Puede (XsP) amosando’l so sofitu al Día de la Reciella y la Tresmisión Interxeneracional del Asturianu, qu’algama esti domingu 7 d’ochobre la so sesta edición.”Trátase de manifestar el sofitu a les actividaes y el llabor que’l colectivu Reciella: families pol asturianu vien faciendo dende va seis años”, esplica Mario Suárez del Fueyo, portavoz de XsP. Amás de la declaración, l’Ayuntamientu tien dende esti 3 d’ochobre al domingu una pancarta colgada nel so balcón anunciando’l próximu Día de la Reciella.

Na declaración institucional faesu un recorríu pela historia de Xixón no tocante a la so defensa de la llingua asturiana: principiando por Gaspar Melchor de Xovellanos, que definió hai más de 200 años l’asturianu como “la llingua viva del nuestru pueblu”. Tamién se menta a Xosefa Xovellanos, hermana del ilustráu, que cultivaba la poesía n’asturianu ente finales del sieglu XVIII y primeros del XIX. Nesti sieglu, otra de les figures destacaes ye l’alcalde Juan Junquera Huergo, responsable de la primer Gramática Asturiana y el primer Diccionariu Asturianu. Too ello sin escaecer la obra d’escritores venceyaos a Xixón como Pachín de Melás, Pin de Pría o Enrique García-Rendueles y tol movimientu cultural y de reivindicación llingüística que nel sieglu XX y el XXI se vieno desarrollando en Xixón.

L’alcuerdu que se propón na declaración, amás d’espresar el sofitu al Día de la Reciella, pretende ser una forma de “anovar el compromisu históricu de la ciudá y de la Corporación cola tresmisión interxeneracional del asturianu, faciendo un llamamientu a la población a facer efectivu l’usu y la tresmisión de esta llingua histórica”. Otra de les cuestiones que se recueyen na declaración ye’l compromisu de “favorecer, potenciar y ampliar les midíes que dende l’ámbitu institucional sían pertinentes pa que les families xixoneses que lo deseyen puedan conocer les ventayes de la tresmisión del asturianu y que tengan facilidaes por que los sos fíos y fíes tengan opciones pa socializase al traviés de la llingua asturiana”.

Mónica Fernández, de l’asociación Reciella, remarca la importancia de la declaración “pol so simbolismu”, y señala qu’al mismo tiempu ye “una consecuencia lóxica de la historia y el compromisu d’esti conceyu y d’esta ciudá cola tresmisión del asturianu”. Otru de les cuestiones sobre les que llama l’atención Fernández ye que “la declaración tenga l’apoyu de fuercies diverses que tienen en común, nesti casu, el deséu y la voluntá de que la llingua asturiana tenga aseguráu’l so futuru”. Siempre teniendo en cuenta, en palabres de la integrante de Reciella, que “la llingua asturiana nun tien dueñu y nun pertenez más qu’a la xente que se preocupa pol so futuru y la considera una parte non escluyente de la nuestra identidá. Eso pareznos que ye lo que va a enseñar al conxuntu d’Asturies el conceyu de Xixón al sofitar esta iniciativa”.

Reciella tien el so ámbitu d’acción en toa Asturies, con actividaes diverses, como la escuelina que se fae n’Uviéu, Xixón y Bimenes o les xornaes “Escenines” de teatru n’asturianu qu’añu tres añu celébrense con bien de cayida.