Fae munchos años que ta enriba la mesa la reivindicación de la oficialidá de la llingua asturiana. Nesti momentu l’escenariu políticu y social lleva a pensar que les tornes pueden tar cambiando, como rescampló en dos fechos recientes qu’amuesen movimientos favorables a esti reconocimientu xurídicu de la llingua asturiana. Ún d’ellos foi la presentación del Proyectu 2018 pola Oficialidá, impulsáu pola Xunta pola Defensa de la Llingua Asturiana (XDLLA), na qu’hubo una amplia representación política, sindical y social, cola presencia incluso del rector de la Universidá d’Uviéu. L’otru foi l’aprobación nel últimu congresu de la FSA de una enmienda na que’l partíu espresa, pela primera vez na so historia, el so apoyu a la oficialidá del asturianu.

Estes circunstancies lleven a Xixón Sí Puede (XsP) y Izquierda Unida (IU) a presentar una propuesta conxunta nel Plenu de payares pa que’l Conceyu de Xixón “inste al Gobiernu d’Asturies y a les distintes fuercies polítiques con representación parllamentaria a entamar un procesu de diálogu y consensu cola fin d’algamar l’oxetivu de la oficialidá nesta llexislatura, principiando los trámites necesarios pa la reforma del Estatutu d’Autonomía d’Asturies col oxetivu d’incluyir nel mesmu la oficialidá de la llingua asturiana”.

“Nesti momentu pue haber una mayoría parllamentaria n’Asturies que podría llevar alantre esta reforma estatutaria. Agora, traemos a Xixón esta propuesta porque ye’l conceyu con más habitantes d’Asturies y posiblemente ún de los sitios onde más se ta apostando pola normalización de la llingua. Esta iniciativa ye un llamáu p’afalar al Gobiernu a plantegar la reforma estatutaria”, indica Mario Suárez del Fueyo, voceru de XsP.

Dende’l grupu municipal señálase que l’asturianu ye “una ayalga, un patrimoniu cultural que ye fundamental que tea normalizáu y cola reconocencia xurídica de la oficialidá, tal como lo tienen el resto de les llingües n’otres comunidaes autónomes, ensin qu’eso sía fonte de nengún tipu de conflictu”, continúa Del Fueyo. Na misma llinia se manifiesta Aruelio Martín, voceru d’Izquierda Unida de Xixón: “Abultónos que yera’l momentu de dar un pasu alantre con esti tema y pasar de les palabres a los fechos y de les complicidaes a les realidades”.

Esta iniciativa cuenta col respaldu de colectivos en defensa del idioma como la Xunta pola Defensa de la Llingua Asturiana (XDLA) y Iniciativa pol Asturianu. Inaciu Galán, representante d’Iniciativa pol Asturianu, afala al restu de los grupos municipales a sofitar la propuesta: “Ye importante avanzar nel consensu, porque la superviviencia del idioma nun se pue dar d’otra manera si nun ye cola reconocencia de la oficialidá. Un consensu qu’había ser como’l que yá hai na sociedá asturiana, como se reflexa nel avance del III Encuesta Sociollingüística d’Asturies na que se fala de cómo l’apoyu a la normalización y a la oficialidá ye mayoritariu, superando’l 50%, y esi consensu na cai tien de vese tamién nes instituciones”.

Dende la XDLA, Xosé Candel recuerda que’l Proyectu 2018 ye “precisamente una llamada a axuntar fuercies pa consiguir cuanto enantes la oficialidá y pa ello la única forma ye una reforma del Estatutu d’Autonomía, un procesu que nun tien por qué ser traumático y que tamos en condiciones de conseguir”. Asina, la XDLA, amás de sofitar la propuesta que se presenta en Xixón, va a promover que se presenten iniciatives asemeyaes n’otros conceyos.

No que cinca al cambiu de postura de la FSA nesti asuntu, Candel valora que se da un reblagu al reconocer la llingua asturiana “como fonte de derechos y d’ehí derívase la situación d’inxusticia que se carez. Cuando se detecta una inxusticia lo qu’hai que facer ye iguala lo enantes posible y agora hai una mayoría suficiente na XDLA pa esa reforma estatutaria y esta llexislatura ye’l momentu pa facelo”. Al empar, la XDLA apunta que ye necesario non tracamundiar la reforma estatutaria coles negociaciones presupuestaries: “Pue ser negativo qu’un fracasu nel alcuerdu presupuestariu s’achaque a la demanda de dellos partíos de la oficialidá. P’aprobar la oficialidá namás fae falta una reforma estatutaria na Xunta Xeneral y eso ta al marxe de cualquier partida presupuestaria”.